Эксперты: чалавечы капітал з'яўляецца найбольш важным для эканамічнага росту

"Асноўныя параметры праграмы, якая вызначае дынаміку развіцця краіны на бліжэйшыя пяць гадоў, звязаны ў першую чаргу з даволі высокімі тэмпамі эканамічнага росту - 4-5 працэнтаў за год. Цяпер у Беларусі больш спрыяльныя стартавыя пазіцыі пасля зніжэння з-за пандэміі ў 2020 годзе: многія краіны пасля ўвядзення строгага лакдаўну і абмежавання фактычна ўсёй эканамічнай дзейнасці атрымалі вельмі значны мінус. Наша краіна ў параўнанні з іншымі паказала добрыя тэмпы. Аднак трэба разумець: каб забяспечыць гадавы прырост ВУП на ўзроўні 4-5 працэнтаў, неабходна значная мабілізацыя эканамічнага блока, кіраўнікоў і дзяржслужачых. Час павінен быць на нашу карысць, цяпер недапушчальна зацягванне праектаў і тэрмінаў іх рэалізацыі, тармажэнне ў пашырэнні беларускай прадукцыі і паслуг", - лічыць эксперт.

Паводле яго слоў, адзін з прыярытэтаў праграмы - інвестыцыі ў адукацыю, ахову здароўя, інфраструктуру разумных гарадоў. "Дарэчы, тыя ж Злучаныя Штаты Амерыкі сёння прапануюць рабіць стаўку менавіта на гэтыя сферы, каб выйсці з каранакрызісу. Чалавечы капітал - чалавек, якасць яго жыцця і здароўе - з'яўляецца найбольш важным для эканамічнага росту. Добрая адукацыя дае магчымасць падрыхтаваць высокакваліфікаваных спецыялістаў, здольных генерыраваць новыя веды, карыстацца новымі тэхналогіямі. Менавіта такія спецыялісты будуць ствараць максімальную дабаўленую вартасць. Такім чынам, прыярытэт эканамічнай праграмы вызначае прыярытэт сацыяльнага развіцця", - адзначыў Аляксей Аўдонін.

Дэкан факультэта філасофіі і грамадскіх навук БДУ Вадзім Гігін згодны, што цяперашняя праграма, як і ўсе папярэднія, арыентавана на інтарэсы чалавека, а ўсе паказчыкі ў ёй збалансаваны.

"Важна, каб мы разумелі гэтыя мэты. Таму тут вялікая адказнасць ускладзена не толькі на ўрад, органы мясцовай улады, але і на СМІ, грамадзянскую супольнасць. Арыенціры развіцця краіны і грамадства патрэбны для таго, каб у гэты складаны для ўсяго свету час мы дакладна разумелі, чаго чакаем ад дзяржавы, што можам ад яе запатрабаваць, а ў якіх пытаннях дзяржава можа паспадзявацца на сваіх грамадзян. Стварэнне мадэлі "дзяржава - партнёр" - гэта новы этап беларускай мадэлі развіцця. З майго пункту гледжання, гэта самае галоўнае: выбудоўванне мадэлі "дзяржава - грамадства - чалавек". Што датычыцца эканамічнага забеспячэння пэўных задач, беларускі фінансава-эканамічны блок ужо не першы год на міжнародным узроўні ацэньваецца даволі высока. Таму пастаўленыя мэты рэалістычныя", - падкрэсліў Вадзім Гігін.

Эксперт РГА "Белая Русь" Пётр Пятроўскі падкрэсліў, што задачы праграмы хоць і напружаныя, але рэалістычныя. "Хтосьці можа палічыць такія праграмы нейкай формай прапаганды, але на самай справе праект праграмы сацыяльна-эканамічнага развіцця да 2025 года мае рэалістычны характар, зыходзіць з рэальных магчымасцей і той геапалітычнай і сацыяльна-эканамічнай сітуацыі, у якой апынулася наша краіна. І кіраўніцтва краіны, і навукова-экспертная супольнасць даволі прагматычна прааналізавалі сітуацыю, вылучылі пэўныя праблемы і паставілі задачу іх вырашаць. І вырашаць не нейкімі пафаснымі заявамі і тэзісамі, а рэальнымі інструментамі, прычым у складанай сітуацыі сусветнага каранакрызісу. Трэба ставіць заўсёды высокія мэты, тады гэта, як у спорце, стымулюе на выкананне задач", - рэзюмаваў аналітык.